Tareekh e Dawat o Tableegh

Amar bil ma'aroof wa nahi anil munkar bhi Ambiya-e-karaam (a.s­.w) ki dawat ka juz raha hai. Aur  unhone apni ummaton ko khair aur bhalai wale aamal ko ikhtiyar karne aur buraiyon se door rehne ki mustaqil tarbiyat di hai. Unke  ahad me is Dawat par jo shukook o shubhaat aayad kiye gaye Hazraat Ambiya-e-kiram(alaihumas salaam­ ) ne intehai saada andaaz me Wahii e Rabbani ki taaeed se unka bhi izaala kiya, kabhi ye jawabat tehqeeqi hote the aur kabhi ilzami, jaisi zaroorat hui waisa usloob ikhtiyaar kiya gaya, lekin Dawat ke bunyaadi usoolon se inhiraaf aur Wahi e Rabbani ki hidayat aur ALLAH ki marzi k khilaaf mahez daf ul waqti ke liye koi jawab na un Hazraat ne diya aur na hi unke shaayan-e-shan tha.

Aanhazrat(s.a.w.s) ki tashrif aawri ke baad Ambiya-e-karam(a.w.s­ ) ki bi’sat ka silsila ikhtetam pazeer ho gaya. Lekin  ye zaroraten baher haal baaqi rahin. Hadees e paak ki roo se ab ye fariza Ulma-e-ummat ke zimmee hai.

Tareekh-e-Islam ke har ahad me hame aise Rijaal kaar nazar aate hain jo taHayaat is silsile me jaddo jehed karte rahe aur aise karhaaye numaya  anjam diye jo tareekh-e-islami me Ek shahkaar ki haisiyat rakhte hain.

Poori tareekh ka bayan karna maqsood bhi nahi aur kisi mukhtasar tareekh me usey bayan bhi nahi kiya jasakta uske liye to daftar hib nakaafi hain,yahan sirf sarsari mutalia hi mumkin hai.

Tareekh me hame dawat-e-islami ko apni zindagi ka maqsood bananey wali beshumar shakhsiyaat milti hain. Sab  me Qadr-e-mushtarak ye tha k Aqeede ki pukhtagi ke sath sath wo Aamaal o kirdaar ki pukhtagi me dusron se kahin aage the aur is jaddo jehed ke dauran bhi kitab o sunnat ke usoolon se inhiraaf ka tassawur bhi na rakhte thee.

Islam ka paigham doosron tak pohanchane me Hzraat  e Soofiya-e-karam(r.a) k­i khidmat naqabil-e-faramosh hain, unho ne na stage sajaye aur na ummat se koi sila talab kia, balke khamooshi se apni jagah pukhta azam o iradey ke sath baith kar logon ko ALLAH ki azmat o kibriyai ki janib bulatey rahe

aur unke kirdaar ki pukhtagi neez aamal ke kitab o Sunnat ke ain mutabiq honey ka ye asar tha k log fauj dar fauj unke paas aate aur kalima-e-shahadat ki gawahi dete huwe islam me daakhil hote. Barr-e-sagheer me aaj jo musalman hain, in me bohot kam aise hain jin ke aaba-o-ajdad Arab ki sarzameen se akar yahan bas gaye hon aur hum unhe pushteeni muslaman keh saken. Aksar  yahan ke log Hazraat e soofiya-e-karam(r.a)k­i dawat aur unke kirdar se mutassir ho kar halqa bagosh e Islam hue aur Bihamdillah unki naslen aaj tak Siraat-e-mustaqim par gaamzan aur Daman-e-Islam se wabasta hain.

Soofiya-e-karam , doosre Ulama ne Ummat ke ihtisaab ki zimmedarian bhi nibhayen aur jo log unse wabasta rahe un Hazraat ne koshish ye ki ke wo Razail se door hon, Islami khaslaton ko apnayen, halal ko ikhtiyar karen, haram se bachen aur ahkamat-e-Ilahia ki tabedari estarha karen ke koi sunnat tark na ho paye. Gharz  ye ke unhone apne mutalliqeen ki tarbiyat is andaaz se ki ke wo islami talimaat par amal paira ho kar sachche musalman ke misdaaq ban saken. Aur  ma'aruf ko ikhtiyar karne aur munkiraat se door rehne ke khugar banjayen.

 Sofiya-e-karam se hamari murad wo soofia hain jo khaalis Kitab o Sunnat ki dawat dene wale the, jo ghuloo me mubtala ya islam ki roshan shahraah se munharif the unka yahan koi zikr nahi, wo ummat ki islah kya kartey khud hi islah ke mohtaj the.

Dawat-e-Islam our Daayee ki zimme dariaan.

BISMILLAHIR RAHMAANIR RAHEEM

 Dawat-e-Islam our Daayee ki zimme dariaan.

         Deen ki dawat Ummat-e-Muhammadia ka ijtema'ee fareeza hai, kitab o sunnat ki Nusoos is par shahid hain ke jin Hazraat tak Tauheed o Risaalat aur Deen ka paighaam nahi pohanch saka Ummat-e-Muhammadia iski Mukallaf hai ke un tak ye dawat pohanchaye.

Huzoor Nabi kareem(sallallahu alaihi wasallam)ki waazeh hidayat hai ke jo log maujood hain wo un hazraat tak ye paigham pohanchaye jo moujood nhi. Dawat ka ek shoba (team) ghair muslims tak Islam ka paigham pohanchata hai. sath hi Amar bil ma'arof wa nahi anil munkar ka fareeza anjam dene wale ek tabqe ka moujood rehna bhi Qura'an ne zaroori qaraar dia hai. Islam aur Islami usoolon ke khilaaf us ahad k motarizeen jo aiterazaat kartey the kitab o sunnat me un ke jawabaat bhi maujood hain. Is tarah Dawat ke ziman me ye teen(3)shobey samney aatey hain.

1: khalis Tauheed wa risalat our Deen-e-Haque ki taraf bulana.

 2: Amar bil ma'arof wa nehi anel munkar.

3: Islam our Islami taleemat ka difaa aur paida keye jane wale shukook wa shub'haat ka izaala.

Ambiya-e-karam(alaihumus salaam)ka awwaleen mansab he Daa’ii Ilallah ka mansab hai. Jitne  bhi Ambiya-e-karam(a.w.s­) ALLAH ki taraf se bheje gaye sabne apni Risalat ke Aelaan ke sath sath ALLAH ki Tauheed, Aqeeda e aakhirat aur ahkam-e-khudawandi ke mutabiq zindagi guzarne ke taraf apni apni ummaton ko bulaya, aur jab tak insanon ke darmiyaan rahe yahi unki jaddojahed ke mehwar raha. Qura'an kareem ne Huzoor Nabi kareem(s.a.w.s) ke awsaaf e hameeda me  داعيا الي الله (Daa’iyan ilallah) ko badey numaaya andaaz me bayan kia hai. (contd in next post insha Allah)